Dat Smeefür is utgahn

De oll Dörpsmid kunn sük över mangelnd Updräg nich beklagen

Een good old Handwark weer hier in Schörtens to Huus, de Dörpsmee. Se hör in fröher Jahren to de Grundversörgung för de Lü. De Dörpsmid kunn sük över mangelnd Updräg nich beklagen. Weern dat doch de velen groten un lüttje Saken, de bloot de Smid maken kunn.

Wi gaht vandaag torügg in de Vergangenheid. In‘t Jahr 1875 köff de Smeemeister Johann Heinrich Peters van Helene Margarethe von der Vring dat Wohnhuus mit Bischür un richt daar de eerst Smee in. Helene Margarethe van der Vring weer de Dochter van Johann von der Vring, de harr dat Huus siet 1853 as Häuslingsstee in Besitz. He weer Schohmakermeister, un man kann vermoden, dat he in dit Huus een Schohmakerwarkstee ünnerhollen hett.

Dat Huus harr groot Schaa un Johann Heinrich Peters reet dat Huus 1889 of. Daarna is dat wedder upboot wurden. 1892 un 1902 kemen noch anner Utboten daarto un de Smee wurr grötter maakt.

Johann Heinrich Peters sloot sük ganz fröh de Brandschutz van de Gemeen Schörtens an. Ut een Protokoll van de Gemeen Schörtens van 5. April 1878 geiht herut, datt P. to`n Sprützenmeister wählt worden is. Vör sien Arbeid kreeg he 7 ½ Mark in`t Jahr van de Gemeen. He muss aver daarvan dat Öl för de Sprütz sülvst betahlen. 1912 övernehm sien Söhn Johann Hinrich Peters de Dörpsmee, nadem he al vele Jahren sien Vader to Hand gahn is. Johann Hinrich Peters heirad 1905 Anna Elise Wessels, se weer ok ut Schörtens gebürtig. De Anfang weer swoor. De Eerst Weltkrieg fung an un 1916 starv de Vader. De Sörgen bleven, keem doch na den verloren Krieg gliek daarna de Inflationstied un de swoor Weltwirtschaftskrise. Aver de Tieden gungen vörbi, bit de 2. Weltkrieg utbreken dee. 1946 muss Johann Hinrich Peters to Grafft dragen wurden. Nettakraat ut de Krieg to-rüggkehrt, övernehm de Söhn Benno Peters, ok Smid lehrt, de Dörpsmee.

Denn kemen de Upschwung- un de Upboojahren. Ut de ollen Updragsböker gaht Arbeiden herut, de för de Tied domaals bit in de 60er Jahren typisch weern. Domaals geev dat noch veel Burenplaatsen, un de Techniseerung weer noch nich so wied vörutgahn. Dat geev noch överall Peer, de Hoofbeschlag muss erledigt worden. Hoofiesen mit Iesnagels mussen maakt wurden, daarmit de Peer bi Glatties sekeren Hold harrn. Dat weer besünners wichtig bi Melkwagengespannen. För dat Veeh worden Kohstallanbinnungen herstellt un Weidehecks boot. Ploogiesen mussen scharp un heel maakt wurden. Of un to mussen ok Melkbummen löt wurden. För dat Boohandwark worden völ Arbeiden maakt, so to`n Bispill Boobeslagen, Hannenlöper un Kellerrosten. För de Privathuushollen geev dat ok veel to doon: Gordengereedskuppen heel maken, Tüllen bi Waterketeln wedder anlöten oder Löcker in Kookpött tolöten.

De Smee weer een Stee för dat Binannerkomen van de Lü. Benno Peters much geern Lü um sük hebben. Hier kunn man allens to weten kriegen, wat sük rundüm daan harr. Dat maak hüm ok nix ut, Terminarbeiden dör allto lang Snacken to versluren. De verloren Tied wurr denn even na Fieravend naholt. Benno Peters weer van stämmig Statur. Hüm maak dat nix ut, de dree Zentner sworen Amboss mit sien Hannen to versetten. Ok bi dat Wiehnachts- un Silvesterbeiern, dat elke Jahr maakt wurr, weer dat bloot hüm mögelk, bloot mit een Hand de swoor Klöppel van de groot Klock to bewegen.

Een Vörfall sall nich verheimlicht blieven. Pastor Gerhard Aden spazeer jeden Saterdag namiddag tegen fiev Ühr in Richt Dykhusen. Up dissen Weg, ganz alleen mit de Natur, formuleer he de nächst Sönndagspredigt. Bi sien Torüggkomen keek he faken noch bi Benno vörbi üm „Goden Dag“ to seggen. Bi een van disse Treffen geev he Benno sien Ringfingerhand. Benno drück fast to, un de Pastor muss up Kneen bidden, he much doch wedder loslaten. För de kleierig Hand bekeem he een noch kleierigen Smeerlapp. Benno Peters griende bloot un truck an sien ni utgahnd Piep.

Tomaal un veel to fröh stürv Benno Peters 1973. För lütt Sett föhr sien Söhn Johannes Peters de Smee wieder, üm de anfungen Updragsarbeiden to Ennen to maken. Wenn ok dat Smeefür utgahn is, so hett Johannes Peters de Smee bi de Behörden anmeldt laten. Somit wurdt ok vandaag noch, wenn ok bloot selten, in veert Generation de Smeehamer swungen. Dat Beiern van de Karkklocken hett „Hannes“ van sien Vader övernomen, un so will ok sien Söhn Hilko tokünftig dat Beiern wiederföhren.
Rudi Rabe

Dörpsmee Peters, Lütt-Ostiemer-Weg 5, rechts dat Armenhuus. De Drütt van links Smid Peters, Foto van 1946.