Helena Rabe muss Lü üm sük hebben

Vör 100 Jahr ut d‘ Eensamkeit na Addernhusen trucken

Hier wordt nu een Geschicht beschreven, de sük so todragen hett. Carl Rudolf Rabe wordt 1867 in Addernhusen geboren. Dat Geburdshuus, nu Waldstraat 33, weer een Forstarbeiterhuus, waar tolesd de Haumester Eilers wohnt hett. De Öllern trucken, as Carl Rudolf noch jung weer, in ‘t Schanzhuus van de Försteree. Dat leeg an de Weg van d‘ „Witt Heck“ na de Landstraat Reepsholt-Wittmund un gehör in de Tieden to de Gemeen Sandel.

As Carl Rudolf Rabe noch bi sien Öllern wohnen dee, lehrt he Helena Rewerts ut Reepsholt kennen. Se weer 1874 direkt neven de Kark Reepsholt in ‘t Küsterhuus geboren. 1897 weer Hochtied un se trucken eerst maal mit in dat Schanzhuus in. Dree Jungs kemen daar up de Welt, Hinrich, Heinrich un Karl. Man för Helena Rabe weer dat in de Gegend üm‘t Schanzhuus to eensaam. Se muss Lü üm sük hebben. Un butendem mit dree Generationen ünner een Dack, dat gung nich mehr. Un so dreev se hör Mann, doch na een Huus to söken, waar he dicht bi d‘ Arbeid weer un se ünner Lü komen kunn.

Un so dreep sük dat, dat 1908 de Auktionator H. A. Meyer ut Jever de Landstee Siebetshuus in Addernhusen mit knapp twee ha Land anbeden dee. De Landstee leeg jüst an d‘ Kant van de Gemeen Schörtens. Up anner Sied van d‘ Straat fung dat jeversk Gebiet an. Un Carl Rudolf un Helena Rabe grepen to. De Vörbesitter, de Landhäusling Johann Siebels Dirks Schmidt, harr dat Huus mit de Schür eerst Anfang van’t 20. Jahrhunnert boot, dat weer also noch nich old. Vör‘t Großherzoglich Amtsgericht in Jever wordt de Koopkontrakt beurkund un de Kooppries van 9000 Mark fastsett. Intrecken kunnen de beiden mit hör Kinner to`n 1. Maimaand 1909. Van de Landgebräucher Heinrich Gerhard Grahlmann ut Addernhusen köff-ten se sük noch twee ha Weideland in‘t Moorland daarto.

Nu muss för de lüttje Buurderee noch dat Veeh daarher. Un so keem Carl Rudolf Rabe up de Idee, dat gesamte Veeh van sien Vader oftokopen, de sien lüttje Buurderee in Schanz upgeven wull. Un so setten se tosamen een Koopverdrag up, de denn ok van dat Großherzoglich Amtsgericht in Jever beglaubigt wordt. Carl Rudolf Rabe köff van sien Vader Hinrich Rabe Veeh un dood Inventar so as 2 Koih 300 M, 2 Zog-ossen 400 M, 2 tweejährig Ossen 200 M, 1 Kohenter 50 M, 2 Kalver 40 M, 2 Schaap 30 M, 13 Höhner 13 M, 1 Egg 10 M, 1 Ackerwagen 190 M, 1 Ploog 10 M, 2 Karren 6 M, 1 Fruchtweiher 10 M, 4 Emmer 4 M, 2 Spaden 4 M, 3 Förken 2 M, 3 Flegel 1 M, 1 Backtrog 4 M, 1 Scheffelmaat 1 M, 1Glasschapp 15 M, 1 Kleerschapp 10 M, 1 Hang-buddelee 3 M, 3 Dischen 10 M, 1 Dutz. Stöhlen 12 M, 1 Regulator 10 M, 1 Kommood 10 M, 2 Spegel 6 M, 3 Satz Bettstellen 15 M, 2 Bedden 60 M, 2 Kisten 12 M, 1 Botterkann 3 M, 2 Rahmfatten 4 M, 3 iesern Pött 4 M un 1 Theekedel 1 M, Summa summarum 1450 M. De Kooppries bruuk Carl Rudolf Rabe nich betahlen, de wordt mit de siet länger Tied ofleist Deensten för sien Vader utgleken.

Wiel Carl Rudolf Rabe as Holtwachter an`t warken weer un ok later, as he dör sien Arbeidsunfall kien groot Hülp mehr weer, muss Helena Rabe de ganze Buurderee smieten. Sömmerdags mörgens un avends na`t Moorland hen un de Koih melken un denn mit Jück de Melk to Foot na Huus hen dragen. Jeden Dag hen un torügg teihn Kilometers! Dat kann man sük vandaag nich mehr vörstellen. Ok nich vörstellen kann man, wenn man hört, dat Carl Rudolf Rabe bloot 28 Mark Invalidenrente kreeg. Carl Rudolf Rabe stürv 1952, sien Froo 1957. De Landstee wordt updeelt in Boo-grundstücken un`t Huus. Hinnerk Hohlen ut Schörtens hett dat Huusgrunstück köfft un een Görneree inricht. De Familienakomen leevt vandaag noch daar.

Dat Gebiet an de Addernhuser Straat un dat Stück an d‘ Klosterweg is nu beboot worden. Bit up een Ekenboom un een Roodbök, de noch stahn bleven sünd, kann man sük nich mehr besinnen, dat fröher de Addernhuser Straat een moi Ahorn- un Ulmenallee weer. Rudi Rabe

„Heidmühle und Schortens in Bildern der Vergangenheit“ wird als Serie fortgesetzt. Wer historische Dokumente und Fotos dafür zur Verfügung stellen kann, wende sich bitte an Georg Schwitters oder an das Kirchenbüro.